Tiramisu? Tira mo ‘ko!

Sa tuwing naririnig ko ang salitang “tiramisu,” dalawang bagay lang ang naaalala ko: ang advertisement ng M.Y. San Grahams kung saan ginamit nila ang salitang ito, at ang pagkaing kanilang ineendorso. Nabaon man sa limot ang advertisement na ito, tunay na tumataktak ito sa akin. Bago ako nagsimulang gawin ang blog na ‘to, tumingin muna ako sa internet ng mga karagdagang larawan. Napag-alaman kong hindi pala isang Japanese dessert ang “tiramisu,” (na taliwas sa naging konsepto ng commercial na tinutukoy ko) sa halip, ito ay isang pagkaing Italyano. Kayo ba, ano ang naaalala niyo tuwing naririnig o nababasa niyo ang salitang ito? Isang matamis na pagkain? Isang mouth-watering dessert? Isang pagkaing nakakapagpalubag-loob? O katulad ng iba pang mga dessert, nakakataba?

Matagal kong pinag-isipan kung ano sa mga paborito kong pagkain ang gagawan ko ng blog. Naisip kong ilagay ang mga street foods na hindi lang mura, ito ay exotic pa! Isa pa ay ang Bicol Express na maaaring magpainit sa malamig na Pasko (literal, at maaari ring konotatibong kahulugan). Sa bandang huli, nanalo ang GRAHAM REFRIGERATED CAKE (Filipino style). Bukod sa madali lang gawin ang dessert na ‘to, maaaring hindi mo na maalala ang pangalan mo kapag natikman mo ang pagkain na ‘to sa sobrang sarap at linamnam nito. Hindi rin ito katulad ng ibang dessert na mahal at mahirap hanapin ang mga sangkap (tulad na lamang no’ng mga ipinapagamit sa ‘min sa kursong Professional Cookery), ang mga sangkap ay umiikot lamang sa graham cracker hanggang sa simpleng mangga na sumisimbolo sa pagka-Pilipino ng dessert na ‘to. Ang pinaghalong lasa ng condensed milk at all-purpose cream ay humahagod sa lalamunan at nagbibigay ng isang kakaibang pakiramdam na tila ba’y ikaw ang pinakamagaang tao sa balat ng lupa, sinabayan pa ng kaunting tamis ng graham cracker at tropikal na lasa ng mangga! Bukod sa mangga, maaari ka ring gumamit ng fruit cocktail, o Cream-O bilang alternatibong palaman sa mga graham crackers. Bukod sa pampisikal na kasiyahan na maidudulot nito sa ‘yo, nagbibigay rin ito ng sustansya mula sa gatas na ginagamit na sangkap (calcium), at ang nutrisyon mula sa mangga o fruit cocktail na maaaring magsilbing antioxidants.

Isa sa mga pinakamasarap na “grahams” o "crema de fruta" na natikman ko ay iyong gawa ng aking pinakamatalik na kaibigan. Itago na lamang natin siya sa pangalang Carmela Beatrice Alora. Espesyal ang pagkakagawa nito dahil sa dagdag na sangkap ng pagmamahal. (Naks!) Ang sinumang nakatikim ng grahams niya ay parang isinumpa na hanap-hanapin ang nasabing dessert. Ito ay katamtamang tamis at lasa. Hindi gaanong sasakit ang lalamunan ng sinumang mangahas na tikman ito. Naalala ko noong huling Christmas party namin ay nagkaubusan ng grahams dahil binabalik-balikan ito ng aking mga kaklase. Ganyan kasarap ang refrigerated cake na ‘to!

Ang Pasko ay papalapit na. Gamitin natin ang simpleng dessert na ‘to upang maiparamdam ang tunay na diwa ng Pasko sa ating mga mahal sa buhay—ang pamamahal. Iparamdam din natin sa kanilang may mga taong nakaaalala pa rin sila sa likod ng nakakapagod at mahahabang oras na iginugugol natin sa mga trabaho o pag-aaral natin. Maligayang Pasko! ;)

--Steffy Villalon, 1H5